بسبوسة بالتوفي لكل عشّاق الحلويات

صبّي التوفي ساخن على البسبوسة وزيّنيها بالقشطة

النهارده  هنقدِّم لكل عشّاق الحلويات البسبوسة بالتوفي؛ جرّبيها وابعتي لنا رأيك فيها...

بسبوسة بالتوفي

المقادير:
2 كوب سميد
2 كوب قشطة
ملعقة كبيرة دقيق
ملعقة كبيرة سمنة
كوب جوز هند
كوب سكر
كوب ميه
ملعقة صغيرة بيكينج باودر

مقادير التوفي:
2 كوب سكر
كوب قشطة
كوب ميه

الطريقة:
1- اخلطي السمنة مع القشطة والبيكينج باودر والسكر وقلّبيهم كويس أوي، وبعد كده ضيفي دقيق السميد وجوز الهند والميه، وقلّبي كل المكونات مع بعض لحد ما تتجانس.

2- هاتي الصينية وامسحيها بأي مادة دهنية زي الزيت أو السمنة، ورشّي عليها طبقة خفيفة من الدقيق، وبعد كده صبّي فيها خليط البسبوسة، ودخّليها الفرن لمدة 35 دقيقة.

3- لتحضير التوفي: حطّي السكر في حلة على النار، وقلّبي السكر لحد ما لونه يبقى دهبي، وبعد كده ضيفي عليه الميه والقشطة تدريجيا واستمرّي في التقليب، لغاية ما كل المكونات تتجانس.

4- حطّي البسبوسة ساخنة في طبق التقديم، وصبّي عليها التوفي وهو ساخن، وقدّميها.. 

                                وبالهنا والشفا.