اكلات من في المطبخ الهندي

 

يلّا بينا ندخل المطبخ الهندي

طبعاً الأكل المصري الأصيل اللي كلنا بنحبه زي الكشري والملوخية والمحشي وغيرها من الأكلات اللي بتعتبر تراث الأكل المصري ما حدش يقدر يستغنى عنه..

لكن أكيد كلنا من وقت للتاني بنبقى عايزين نجدد في أكلاتنا، ونذوق حاجات جديدة ونجرّب نكهات مختلفة في الأكل...

علشان كده فكرنا إننا ندخل كل مطابخ العالم، وننقي منها أكلات مختلفة تكون جديدة وفي نفس الوقت تكون سهلة وبسيطة..

والنهارده عزومتنا كلها هتكون أطباق من المطبخ الهندي يا رب تعجبكم..

يلّا بينا ندخل المطبخ الهندي..
ونشوف هنعمل إيه...

                                               **********************

الميلك شيك الذهبي
والعصير ده طعمه لذيذ جداً وكمان طريقته سهلة، وشكله بيبقى تحفة...

المقادير:
كوب عصير أناناس
كوب عصير برتقال
2 كوب لبن
6 معالق كبيرة سكر
ثلج مجروش

للتزيين:
كوب كريمة فريش

الطريقة:
1- اخلطي عصير البرتقال مع عصير الأناناس، وضيفي ليهم السكر وذوّبيهم كويس، وبعدين حطي اللبن واضربيهم في الخلاط مع بعض، وحطيهم في الثلاجة.

2- عند التقديم، حطي الثلج المجروش في الكاسات، وصبي عليه العصير، وممكن تزينيه من على الوش بالكريمة، وممكن تحطي بعض شرائح الأناناس أو البرتقال.


                  وبالهنا والشفا.
**********************

سلطة البيض بالبطاطس
دي سلطة مفيدة جداً، وتعتبر وجبة متكاملة؛ لأنها فيها بروتينات وخضروات ونشويات وأملاح وألياف، وممكن نعملها في أي وقت وناكلها كوجبة لوحدها..

المقادير:
6 بيضات مسلوقين
2 ثمرة بطاطس مسلوقة
ثمرة فلفل أخضر أو ألوان مقطعة شرائح
ثمرة بصل مقطعة شرائح
ثمرة طماطم مقطعة شرائح
2 معلقة كبيرة عصير ليمون
بقدونس مفروم
ملح وفلفل أسود

الطريقة:
1- قطّعي كل بيضة نصفين، وخدي الصفار واهرسيه كويس مع البطاطس المسلوقة.

2- اخلطي الملح والفلفل مع عصير الليمون والبقدونس المفروم، علشان تعملي التتبيلة بتاعة السلطة، وبعد كده حطي التتبيلة دي مع بياض البيض واخلطيهم مع بعض، وسيبي البيض شوية علشان يشرب من التتبيلة.

3- بعد كده حطي بياض البيض المتبّل مع خليط صفار البيض والبطاطس المهروسة في طبق التقديم، وزينيه بشرائح الفلفل والطماطم والبقدونس والبصل، وقدّميه 

                                  وبالهنا والشفا.

     ***********************


                                     

شوربة ثوبا "Thupa"

المقادير:
كوب صلصة طماطم
معلقة كبيرة زنجبيل مطحون
معلقة كبيرة ثوم مفروم
كوب مكرونة أو شعيرية مسلوقة
ملح وفلفل
معلقة كبيرة سكر
4 معالق كبيرة فريش كريم
3 كوب ماء

الطريقة:
1- اخلطي صلصة الطماطم مع الثوم والزنجبيل والملح والسكر والفلفل الأسود والماء، وحطيهم على النار وسيبيهم لغاية ما يغلوا.

2- أول ما الشوربة تبدأ في الغليان، ضيفي المكرونة المسلوقة والكريمة، وسيبيهم يغلوا كلهم مع بعض من دقيقتين لثلاث دقائق، وممكن تضيفي كمية صغيرة من خليط الخل والصويا صوص علشان تديها طعم لاذع شوية، وبعد كده قدميها 
                       
                             وبالهنا والشفا.


    ***********************


                                    

الفراخ الملكية "golden chicken"
طبعاً كلنا عارفين إن المطبخ الهندي بيتميّز بالتوابل اللي بتخلي لأكلاتهم ريحة وطعم مميزين جداً، والنهارده هنعمل صنف من وراك الفراخ بتتبيلة خاصة وحلوة جداً...

المقادير:
وراك فراخ كبيرة "الكمية حسب العدد"
زبدة
ثمرة بصل صغيرة مقطعة شرائح صغيرة
حبهان
قرنفل
عود قرفة
ثوم مفروم
زنجبيل مفروم
كركم
فلفل أحمر مطحون
ملح
علبة زبادي
شوربة فراخ مصفاة
1/2 كوب كريمة لباني
1/2 حبة جوزة الطيب

الطريقة:
1- أحضري وراك الفراخ واغسليها كويس، وشيلي منها الجلد، واخليها من العظم.

2- قطعي كل ورك إلى ثلاثة قطع متساوية في الحجم، واشطفيهم مرة تانية، وسيبيهم على جمب علشان يصفوا الميه اللي فيهم.

3- سيّحي الزبدة على النار، وبعد ضيفي شرائح البصل والحبهان والقرنفل والقرفة، وقلبيهم مع بعض على نار متوسطة لغاية ما تلاقي إن البصل بقى لونه شفاف.

4- بعد كده ضيفي عليهم الثوم والزنجبيل وقلبي الخليط كويس مع بعضه لمدة 30 ثانية.

5- بعد كده ضيفي الفراخ ومعاها الكزبرة والكركم والفلفل الأحمر المطحون، واستمري في التقليب، وبعدين ضيفي شوربة الفراخ، والملح وسيبي الخليط على النار لغاية ما يغلي.

7- بعد ما الخليط يغلي، هدي النار شوية مع التقليب المستمر لغاية ما تحسي إن الخليط استوي وإن البصل اتهرس تماماً.

8- بعد كده ارفعي الخليط من على النار، وذوّبي فيه الزبادي ورجعي الخليط تاني على النار، وقلبي لغاية ما تحسي إن كمية الخليط قلّت، وبقى السائل الموجود حوالي نص كوب.

9- بعد ما تحسي إن السائل اتبخر تماماً، ضيفي كمية تانية من الشوربة، وسيبيها تغلي مرة تانية على النار، وبعد كده قللي النار عليها، وغطيها وسيبيها تستوي على نار هادية.

10- بعد ما الخليط يستوي قلبيه لمدة 5 دقايق، وبعدين ضيفي عليه جوزة الطيب المفرومة وقلبي كويس، وغطيها مرة تانية، وسيبيها تستوي على نار هادية جداً، لغاية ما تلاقي عندك صوص سميك.

11- ارفعي الفراخ من على النار، وصبيه في طبق التقديم، وممكن تزيني الطبق من فوق بالكزبرة الخضراء المفرومة، وقدميه. وعلى فكرة الطبق ده في الهند بيقدّموا معاه نوع من الخبز اسمه خبز "الفولكا".
 
                                     بالهنا والشفا.

                                       ***********************

جولاب جومان "gulab jamun"
ده طبق حلو وبيعتبر من الأطباق الشعبية جداً في الهند، وهو بيشبه كتير "لقمة القاضي" عندنا في مصر..

المقادير:
كوب لبن بودرة
3 معالق كبيرة دقيق
2 معلقة كبيرة زبدة سايحة
1/2 معلقة صغيرة بيكينج باودر
1/2 كوب لبن دافئ
معلقة كبيرة لوز مفروم "اختياري"
معلقة كبيرة فستق مفروم "اختياري"
معلقة كبيرة زبيب "اختياري"
حبة حبهان مطحونة
زيت غزير للقلي
كوب وربع سكر
كوب ماء
معلقة صغيرة ماء زهر

ملحوظة:
المقادير دي بتعمل حوالي 20 قطعة

الطريقة:
1- في وعاء عميق، اخلطي اللبن البودرة مع الدقيق والبيكينج باودر والحبهان واللوز المفروم والفستق.

2- بعد كده ضيفي عليهم الزبدة السايحة، واخلطيهم كويس وبعدين ضيفي اللبن الدافي، واستمري في التقليب لغاية ما كل المكونات تختلط كويس ببعضها.

3- غطي الخليط وسيبيه يخمر لمدة 20 دقيقة.

4- لتحضير الشربات اخلطي السكر مع ماء الزهر والحبهان في طاسة كبيرة، وحطيهم على النار وسيبيهم يغلوا مع بعض شوية لمدة دقيقة، وبعدين ارفعي الطاسة من على النار وسيبيهم شوية.

5- أحضري طاسة تكون عميقة شوية، واملي نصفها بالزيت، وسخنيه على نار متوسطة لمدة 5 دقايق على الأقل.

6- في الوقت ده أحضري العجينة واعمليها على شكل كورة صغيرة، وبعد كده وطي النار على الزيت ، وابدئي اقلي كورات العجين.

7- أول ما تلاقي كورات العجين بدأت تطفو على سطح الزيت وحجمها تضاعف، ارفعي النار لدرجة متوسطة وقلبي الكورات لغاية ما تلاقي إن لونهم بقى ذهبي.

8- ارفعي الكورات وحطيهم على مناديل ورق وسيبيهم يبردوا، وبعد ما تبرد حطيهم في الطاسة اللي فيها الشربات، وسيبيهم على نار متوسطة لمدة 5 دقايق.

9- بعد كده صفيهم من الشربات كويس جداً، وممكن تقدميهم وهما سخنين أو تقدميهم باردين، 

                       وبالهنا والشفا.