خضراوات مشكّلة بالحمص

زيّني الطبق بأوراق الكزبرة الخضراء

المقادير:

• ¼ كيلو كوسة
• ¼ كيلو جزر
• ثمرة فلفل أخضر
• بصلة كبيرة مفرومة
• 3 فصوص ثوم مفروم
• ¼ كيلو بسلة مسلوقة ومصفاة
• ¼ كيلو حمص مسلوق ومقشّر
• كوب كبير شوربة لحمة أو فراخ
• كوب كبير عصير طماطم
• ½ ملعقة صغيرة كمون
• 2 ملعقة كبيرة زبدة
• ملح وفلفل

الطريقة:
1- قطّعي كل الخضار اللي عندك مكعبات صغيرة.

2- شوّحي البصلة في الزبدة على النار لمدة 10 دقائق، أو لغاية ما تلاقي إن البصلة لونها بقى دهبي، وبعدين ضيفي عليها الكوسة والبسلة والحمص وقطع الفلفل الأخضر والثوم، وقلّبيهم كلهم على النار لمدة ربع ساعة.

3- بعد كده ضيفي عليهم عصير الطماطم والملح والفلفل والكمون، وسيبيهم على نار هادية لمدة نص ساعة علشان الطماطم تتسبّك مع الخضار.

4- ضيفي الشوربة على الخضار بعد ما الطماطم تتسبّك، وسيبيهم على النار لمدة ربع ساعة، وبعد كده اغرفي الخضار في طبق التقديم، وزيّنيه بأوراق الكزبرة الخضراء.. 


                         وبألف هنا وشفا.