ساليزون جامد ولذيذ

طريقة عمل عجينة الفيتاج

المقادير:

• 1/2 كيلو دقيق
• 1/2 كيلو زبدة
• كوب ونصف مية
• ملعقتين عصير ليمون
• 1/2ملعقة صغيرة ملح

الطريقة:
1- أول حاجة جهّزي قالب الزبدة؛ افرديها في كيس بلاستيك بسُمك 1/ 4 سم، وحطّيها في التلاجة علشان تتجمد.

2- لتجهيز العجينة: حطي الدقيق والملح وعصير الليمون في العجانة وشغّلي العجانة، وضيفي عليها المية تدريجيًّا علشان تقدري تتحكمي في العجينة.

3- خلّي العجينة تتعجن لمدة 3 دقائق على السرعة الأولى، ولو حسيتي إن العجينة محتاجة مية كمان ممكن تزوّديها؛ لأن ده بيكون على حسب نوع الدقيق.

4- بعد ما العجينة تتعجن حطيها في كيس بلاستيك، وسيبيها لمدة نصف ساعة علشان تبقى جاهزة للتشكيل.

5- بعد النصف ساعة رشّي دقيق على الرخامة وافردي عليها العجينة، وبعدين نظفيها من الدقيق كويس، وحطي قالب الزبدة جواها، وطبّقيها من الأربع الأجناب بشكل الظرف.

6- بعد ما تطبّقيها رشي عليها دقيق من فوق وتحت، وافرديها بهدوء بسُمك نصف سم؛ لحد ما تحسي إن الزبدة اندمجت في العجينة تمامًا، ونظفيها من الدقيق كويس، وبعدين طبّقيها مرة كمان زي الظرف، وحطيها في كيس بلاستيك، ودخّليها التلاجة لمدة ساعة.

7- هتكرري الخطوة السابقة لمدة 4 مرات؛ ولكن دون إضافة الزبدة؛ يعني هتفرديها بارتفاع 1/ 2 سم، وبعدين تطبّقيها وتحطيها في كيس بلاستيك وتدخّليها التلاجة؛ والخطوة دي هي اللي بتخليها تكون مورقة وهشّة.

بعد ما العجينة تكون جاهزة ابدئي شكّليها؛ ودي ممكن تعملي منها أصناف كتيرة زي الساليزون.

الساليزون بالجبنة:
المقادير:

• 1/4 كيلو عجينة فيتاج
• بيضة

لعمل الحشو:

• كوب جبنة كريمي
• 1/ 4 كوب زبدة
• حزمة شبت مفروم
• ملح وفلفل

الطريقة:
- قطّعي العجينة بأي قالب عندك صغير بالحجم والشكل اللي أنتِ عايزاه، ورصيهم في صينية، ودخّليها التلاجة لمدة 10 دقائق، وبعدين ادهنيها بالبيض، ودخليها الفرن على درجة حرارة 200 درجة، لمدة 25 دقيقة.

- في الوقت ده حضّري الحشوة؛ حطي كل المكونات مع بعض، واضربيها بالمضرب، أو حطيها في العجانة لحد ما تندمج كويس.

- بعد ما الساليزون يطلع من الفرن افتحيه من النصف، وحطي خليط الجبنة في كيس الحلواني وابدئي احشي الساليزون، وبعدين حطي عليها الطبقة التانية من فوق، وزينيها بورق الشبت من المنتصف.

- ممكن تعملي الطبقة اللي تحت صغيرة، وبعدين تحشيها وتحطي الطبقة اللي فوق تكون أكبر وتحطيها عليها، وتضغطي عليها من الأجناب كويس أوي علشان تتماسك الطبقتين مع بعض، وبعدين تفتيحها من فوق خطين عكس بعض؛ علشان يخرج منها الهوا، وبعدين رشي عليها سمسم أو حبة البركة، ودخّليه التلاجة لمدة 10 دقائق، وبعدين دخليه الفرن.

- ممكن كمان تقطعي العجينة وتدهنيها بيض وتحشيها وتقفليها من جانب واحد زي شكل القطايف.


ملحوظة: ممكن تغيّري في شكل الحشوة؛ زي مثلًا اللحمة المعصجة، أو خليط الفيتا مع الزيتون والنعناع، أو الخضروات ، أو خليط السي فود، كمان تقدري تغيري في شكل العجينة وطريقة الحشوة فيها.

أهم حاجة تسيبي العجينة في التلاجة بعد ما تحشيها لمدة 10 دقايق، وكمان لازم تكون نظيفة تمامًا من أي دقيق عليها؛ علشان لما تدهنيها بيض يعمل زي مادة لاصقة بين العجين.