النهارده هنقدّم لكم طريقة مختلفة لعمل شوربة الفريك، علشان تقدّمي لأسرتك وجبة دافية ومتكاملة العناصر الغذائية..
المقادير:
½ كوب فريك
بصلة متوسطة مفرومة
صدر فرخة مسلوق ومقطّع مكعبات
3 ملعقة كريمة لباني
ملعقة كبيرة زبدة
2 كوب شوربة
ملح وفلفل
الطريقة:
1- نقي الفريك واغسليه كويس، وبعد كده انقعيه في ميه باردة لمدة نص ساعة وصفّيه من الميه وسيبيه على جنب.
2- شوّحي البصل في الزبدة لحد ما يبقى لونه دهبي، بعد كده ضيفي الفريك وقلّبيهم على نار هادية لمدة 2 : 3 دقائق.
3- ضيفي الشوربة والملح والفلفل، وغطّيهم وسيبيهم مع بعض على نار هادية لحد ما الفريك يستوي، تقدري كمان تزوّدي شوربة وميه لو حسّيتي إنه محتاج.
4- بعد ما تتأكدي إن الفريك استوى، ضيفي مكعبات الفراخ واستني لحد ما الشوربة تغلي، وبعد كده ضيفي الكريمة اللباني وقلّبيهم كويس على النار لثواني، وبعد كده اغرفي الشوربة في أطباق التقديم.. وبالهنا والشفا.