المقادير:
كوب شيكولاتة مقطعة مكعبات صغيرة
1/ 2 كوب بندق مفروم
1/ 2 كوب لوز مفروم
ملعقة صغيرة فانيليا
3/ 4 كوب دقيق
1/ 2 كوب سكر
5 بيضات
الطريقة:
1- هاتي البيض، وافصلي البياض عن الصفار، واضربي البياض بالمضرب الكهربائي مع إضافة ذرة ملح؛ لحد ما تحسي إن كميته زادت، وبقى عامل زي الكريمة أو المارينج.
2- هاتي طبق غويط، وحطّي فيه صفار البيض مع السكر، وقلّبيهم بالمضرب اليدوي كويس لحد ما السكر يذوب، وبعد كده ضيفي الفانيليا.
3- بعد كده ضيفي الدقيق تدريجيا على خليط الصفار والسكر، وقلّبيهم مع بعض بملعقة خشب؛ لغاية ما المكونات كلها تتجانس مع بعضها.
4- بعدين ضيفي قطع الشيكولاتة والبندق واللوز، وقلّبي كل المكونات مع بعض.
5- بعد كده هاتي بياض البيض (المارينج)، وابدئي حطّي منه ملعقة ملعقة على الخليط اللي حضّرتيه مع التقليب برفق؛ علشان تبقى العجينة هشّة.
6- هاتي القالب أو الصينية اللي هتعملي فيها الكيكة، وحطّي فيه ورق الزبدة، وافردي عليه كمية صغيرة من الزبدة، وبعد كده صبّي الخليط.
7- حطّي القالب في فرن ساخن على درجة حرارة 150 : 160 لمدة 45 دقيقة.
8- بعد ما الكيكة تستوي، طلّعيها من الفرن وسبيها تبرد شوية، وبعدين حطّيها في طبق التقديم، وممكن تزينيها بالسكر البودرة والكاكاو.. وبالهنا والشفا.