أحسن دايت لإنقاص والحفاظ على الوزن

هنديك شوية نصايح عشان تعرف تتحكم في كمية الأكل اللي بتاكلها:

1-إملي بطنك بوجبات صغيرة متنوعة:

اخدع جسمك و خليه يحس بالشبع على مدار اليوم بوجبات أقل في الكمية، كُل تلات وجبات صغيرة في اليوم و بينهم وجبتين خفاف و صحيين،الفكره إنك توزع الوجبات علي مدار اليوم فتمنع نفسك من عدم السيطرة علي الجوع و الكميات الكبيرة اللي ممكن تاكلها في وجبة واحدة.

2-خليك في البروتين:

البروتين بيخليك تحس بالشبع لمدة أطول لانه بياخد وقت اطول عشان جسمك يحرقه و كمان بيديك طاقة أكتر تساعدك علي حرق أكتر، و خليك فاكر إن البروتين مش بس لحمة، البروتين موجود فى الزبادى و البيض و السمك والفول والعدس وغيرهم كتير.

3- حجم طبقك:

لو عايز تاكل أقل، طريقة واحدة ممكن تجبرك علي كمية أقل و هي إنك تصغر حجم طبقك فبالتالي هتحط كمية أقل، و لو بتاكل برة ممكن تشارك حد في طبقك، أو تطلب من الجارسون إنه يحطلك نص الكمية و تأخد النص التاني معاك البيت لليوم التاني.

4-نوّع في أكلك:

لما بتلزم نفسك بإنك تمشى على دايت معين، ممكن كدة تحرم جسمك من عناصر غذائية مهمة و بالتالي دا ممكن يكون فيه خطورة علي صحتك، يعني حاول يكون في طبقك معظم العناصر يعني مثلا خلي نص الطبق يكون خضار و ربع من النشويات زي البطاطا و و الربع الاخير للبروتين. ولو بتحب الشكولاته والسكريات، متحرمش نفسك منهم. خلى لنفسك وجبه واحده فى الاسبوع تاكل فيها نوع الاكل اللى بتحبه

افتكر انك مش لازم تعمل دايت عشان تخس او توصل لوزن كويس. حاول تطبق النصايح دي و هيفضل وزنك يقل من غير ما تحرم نفسك من حاجة، أهم حاجة تتحكم في الكميات و تسيطر عليها.